من روائع الشعر الشعبي الليبي

ياما العين تقول
للشاعر الليبي مراد البرعصي

ياما العين تقول عزيز نتركه وتحنث قبل الحول تنسى اقوالها
خلاص يهون وتنسى غلاه وتحسبه مدفون

وناخذ عللها نحسبه مضمون ويخطر علي غفله هذاك الزول

ويبقى شلايل دمع ها لعيون كي ما بخمدة ريح هطل نزول

علي بو ضفايف فوق هالضبون دوب السواد يخالطه بشعول

ورقيق شفاه وهن بلا مسحون حسك مغربيه هذبهن مشتول

مشاتير متكشخ ثمر مشحون منه الحب تقول حب سبول

ونا نلت منهن لوعة المكنون والزَارع الصابه من هضاك ينول

الصبر اولابي من طولة رجاي وقول يا غيابي

ياما عليهم بتت في مندابي وياما علي راسي خذيت ليول

نجازي بلوعه مابرد منشابي ويانالي عرق الرجا مقنول

قبلي الياس اعصره قبل احسابي فيهم وما نلنا جنا محصول

مايا عوينك بطول عذابي ولا تريد تربح مالشقا يا مول

الشعل القطاطي عالكتوف مهابي لولا الونس والطيب قلت صلول

وما حسبتني عندك الا بمنابي ولا يبدلك عني اشنا معلول

تبدلت لاتفني نعدك غابي وندمل علي صبري بلاك دمول

بلاه احملت ومن قول يانا والنحيب بطلت

يغلب الدمع نرد في ما قلت ماقلت لوقطير بالراحه ولو مهذول

يفلت علي وسع المواقب فلت متكيد بغيض ومنبعه منتول

علي ما جرالي فالزمان ونلت متكيد بحملي كاهلي مكبول

حتى ان كان بالخونه علينا ملت نشيلك بسابق لك عنا مشيول

امفيت الشقا مالصوب ماحصلت وهو زاد نورله عزيز الفول

غلاهم هنت ونسيتم ونسيوني بعد ما كنت

وإن جبدوا حذايا في علل غوننت بزين غيرهم نمعي بزين هذول

ونمثل علي ماضي ودوب فطنت علي ناس منه عاتيين كهول

وغالي علي الوطن به ولهنت ورفقة بنات الطوق وام رعول

وبوصف الطبيعه م القوي مكنت تمكين لين ما نوخذ ونا مغفول

مي وخاذ شي خضر الناس امنت خذوني بخضلااهم نكون جهول

وان كان هذا تفسيرك لما بينت خطيت بالمسامع لا تكون عجول

من جالا الا مدعى غلا رهدنت بناره ومن ياسه هديد حيول

ماصدقت انسيتم ونسيوني وياني رقت

وماتقول فيهم لا نهار علقت دمايه ولا هلها حماة الشول

اياما وهو مايل وشين الوقت كلنك غوال ان كان مانك غول

وماتقول فيهم شي بطول سبقت والزين قيسهم غفلوا عليه غفول

بينهم وبينك يا كريم طلقت يا من عليم بما خفي مجهول

وحبلي بحبلك في خفاي علقت ما ينقطع منك رجا ميصول

حتى ان كاني ماعمرني رقرقت ولا بغايتي نرثي فقيد رحول

راحل على الدنيا وفيك عشقت وباب رحمتك لا رد لو مقفول

علي قلب رايف قال نا انحرقت بفقد الغوالي مالزهها مغلول

تبات قنوعه تنسى غلاه وتتركه ميضوعه

في وقت سابق من غلا مليوعه وان زال دمعها داير عليه سيول

غالي إحجر والجرح دار هلوعه من قول اه والمشكى بقيت خجول

فيهن وعقلي زاد ناصب نوعه والعين زاد في ماجب غلاه تعول

بكاية مقابر كبدها مقطوعه رقيقة عزايم صبرها مقلول

قليلة مشاكي فوقها مردوعه صليبه وشالت ع الحمول حمول

شغلها الصاحب في هذيل دموعه ووجهه الطيب بالبكا مبلول

العابد الزاهد بالكريم ولوعه كنيب عنه فالبكا محمول

بكاه فقد غاليه ومي مبدوعه وعالفقد من قبله بكي الرسول

وحتى وكل حيه بالفنا متبوعه ويفنى العمر وكل حال يزول

بريت الأراضي ع الحنن فيجوعه هوال سود ما يقهر بعدهن هول

نهون غلاه وعندي عزام بهن نعيش بلاه

ويالعقل لا تبقى تذوح وراه قوي عزايمك باصبر يا مهبول

كيف مانسي عبد العزيز انساه وخلك ركوحي لا تكون ملول

الي وصفها توصيف وان زهاه بقلعة المرمر والشراب اشلول

بارم بها ويشل قال ضناه كما ورد متفتح فرح بطلول

والشمس اتواقد قال بيض عضاه ودوره مسافي قال مو مجدول

واشعل كتوفه فاتن كساه ووين ما قعد ما بان من مسبول

وديما علي طرف اللسان اسماه والفال بالسعد نطقه يجي معدول

والصبر والسلوان حن عطاه ربه ورونق ع الهدا مدلول