انريدوا إشهادة حقّ يامصراته

هذي قصيدة حسن بوالدرديه قيلت عند زيارة وفد اعيان مصراته الي برقه

وقيلت في الشهيد علي عطية الله حدوث لعبيدي

=================================

انريدوا إشهادة حقّ يامصراته ** ولدنا نقص شى يوم قبل إمّاته

... ... ...

... انريدوا أشهادة حق يارجاله ** ولدنا نقص شى يوم فى ما قاله

انكان زين سهرونا على مواله **وانكان عفن لاتحكوا على مدعاته

وانتوا شهوده فى جميع افعاله ** والله والنبى سهروا على ميزاته

الله والنبى قولوها ** أوراها شهادة حق لاتكنُوها

انكان زين.. زين اوزينته نبُوها ** رصيد الـ ضناه أيزيد ذكرياته

وانكان عفن قدام العرب ورُّوها ** بيش يسكتن من تو بكاياته

سهروا عنه ** راها أشهادة حق ميش امّنه

موش لاجل قابيته اوصوله لنا**أختام سمح نلقانه غفر سياته

انشقّ اوجاكم ** نلقاها انه دار البيان امعاكم

عطا دور دون الوطن كيف ضناكم **ربط شرقنا بالغرب ما هاساته

ودون ليبيا راه الشهيد أفداكم ** الله يرحم المرحوم حد حياته

كلا عزانا فيه كيف عزاكم **ما من اللى قبله الموت خذاته

ولا انريد نشكركم على مصباكم **عطا الوطن ماسمي طريق شماته

إدريس سعيد إدريس الشيخي في سطور

       

صورة
توفي الشاعر المعروف إدريس سعيد إدريس الشيخي عن عمر يناهز الـ(66) عاماً في مدينة البيضاء في يوم عيد الأضحى المبارك بتاريخ 16-11-2010م .. ولد الفقيد في مدينة اجدابيا عام 1944م وهو من قبيلة أولاد الشيخ،، انتقل إلى مدينة البيضاء عام 1953م وعمره (9) سنوات وعاش أغلب حياته في البادية جنوب منطقة الجبل الأخضر (( اسلنطة - جردس - تنملو- الثعبان - البلط ...إلخ )) مع قبيلة البراعصة وتزوج منهم وكانوا يعتبرونه أحد أفرادهم ويكنون له كل الاحترام وقال فيهم العديد من الأشعار وعشق الشاعر الفقيد الصحراء ورحلات الصيد كما في أغلب أشعاره. وعرف الشاعر الفقيد بالعفة والكرامة بالرغم من قلة امكانياته المادية حيث تركزت معظم أشعاره عن الصبر على الفقر والاتكال على الله سبحانه وتعالى ....
ومن روائع أبياته على الصبر:
الصبر زين ياصالح دوا للعلا ...............والموت لاحقه على الخلق كلا كلا
عليش اتكابى ومغير منزوي وتقول ياغيابي...........للموت كلهم هلي أحذاك مصابي
ومايدوم فلدنيا الا وجه الله والموت غايره فلى ..بعيد أترابى اوقات تعصرا قبلاً ايطول أمحلا
أما عن العفة فكانت بعض أبياته:
يا العقل رزقك مو على مخلوق ***على أللى بريحه فـ السحاب إيسوق
عليه أتكالك **ويقدر إيحقّق كلّ ما في بالك
مااتطول م الدنيا أمغير أعمالك** عليك بالقنَع راهو الطمع خزوق
أمعيشة الدنيا موش كي يحلاَلك** مرّات تمتلى مرّه أتجي لقلوق
ماعليه مكيده **عظيم شان يفعل كلّ شيّ إيريده
أما عن الكرامة فقال الشاعر الفقيد:
سارح مع مية جرام كرامة خايف عليهن م الدهر وأيامه...
*نراعى فيهن خايف يضيعن وين ما نرخيهن...
نوالف مع التمويل ونداجيهن...كي تلد شارفهن أتجيب توامه...
وفيها نصيب حليب و تربيهن...يروى جنينها لعند يوم فطامه...
ليام كيف تقدعهن علي ماضيهن...تلقاهن يدورن ريحهن برامه...
أوقات يضكنلك نين تزها بيهن...وأوقات ما يلدن أمغير ندامة...
*من واجبي نرعاهن يا صاحبي ما اردى الحياه بلاهن ...
عندي زريبه فالبساط حذاهن ...خير من قصور مشيده بفخامه
إلخ إلى آخر القصيدة التي فيها عبرة



ومن أشهر قصائد الشاعر الفقيد قصيدة:
يا صاحبي ودّي معاك انخرّف مليان خاطري مليت غدير امطرّف
أعقيل اعطيب ما تجيه غير اللي الراس اتشيب ..
اللي توزنه ميزان موش قريب ..ويطلع عطيب معاه كي تصرف…
لاترافقه لا عد يجيك احبيب..من حاشن عمل روحه خويل امترف…
يا ما فقدنا من رفيق يخيب..كريم وجه يندى مو عطيب امجرف..
أنريد حكايه اتحيد جضار العقل حال الغايه..
وانجيب البعيد قريب في سهرايه..وتسمع جديد معا سهاري شرف…
ميط م العرب ما يعرفوا معنايا..وجملة سهاريهم العقل اتقرف…
لا انريدهم لا يقعدوا يالايا..ديما معاهم ع الخطا نشرف…
ولا ينهضوك ولا بهم عينايه ..كيف النعاج الراكه الهكرف…
نا ديرتي مصلوبة بعيد م العرب كاتف عليه شبوبه..
فوق م الطواري عبرته مكبوبه..مليان نين لجالته يذرف..
لا روده رايد علي مركوبه ..ولا جاه وارد بالقداحه غرف..
من قل الماسك حومته مهلوبه..في وطن خالي ما عليه اتعرف..
نريد سهاري في وطن منبوته رتم وجداري..
وتلقا العزيب معا محاس حباري..في رق ساهل موش حيط حجرف..
ويبقى عليك الزول مو متواري..بطول النظر فوق السراب امحرف..
هاناك يبقى منعدل مشواري..و تاخذ سهاري في جواب امزرف
ومن روائعه الخالدة ايضاً حواره مع البئر الذي اصبح مهجوراً فيقول:
يا معطن ما جاتك ولا عطشانه
الشاعر:
يا معطن ما جاتك ولا عطشانه أيام قبل من حوضك مشت ريانه,,
يا المهول أحكيلي علي مدعا زمانك لول ,,
ما من اذواد و من تريس امجول ,اللي سوقهم ثوبك رسم دنانه,,
واليوم منتهي سايب كسادك طول,وحوضك العالي هدموا سيسانه,,
الدايم المولى كل شي يحول ,كيف تنتهي مدة أيام زمانه,,,,,,
يرد البئر:
يا طول ما حرسوني وخذوا ليلهم سمار ما تركوني,,
وجوه الجهيم بسعيهم فازوني,,وهالحوض يضايق معا دعكانه,,
(الدنيا قليلة خير يامضنوني),, واللي حي باين ربنا سبحانه,,,,,
اللي يعرفوني ويعرفوا قانوني ,, ان ماهم كبار رقود ف الجبانه,,
الشاعر:
ما من شوي وركيب عليك دوردن نين النهار يغيب,,
ومنك نون مصدار خالي طيب,,وعدت كحيلة زاكمة طربانه,,
وخشت بساط بعيد موش قريب,,جلايب ,جلايب يلعبن غزلانه,,
لمباكر صلاة الصبح يا الحبيب,,تنوش صيت بوعسكر معا شطبانه,,
يرد البئر:
خلي معطاني وفاقد جماعة يعرفوا قمداني,,
تريس ينفعوا عاشوا علي سقياني,,افراجهم اتجيب الساقية مليانه,,
صدر سعيهم مني علي غيطاني,, مالصيف لولي حايل علي عيدانه,,
تنظر كحيله في سراب مداني,,,مراكب علي مالح قوي طفرانه,,,,
من حاشن مشوا ماعاد واحد جاني,,وترك الحبايب للحبيب خيانه,,
الشاعر:
مانك عليهم هاين عليش منزوي غادي أوجهك شاين,,
شرابك يحيد مالكبود غباين ,,أنتا اجبدك جراري قوي برهانه,,
اتقول الدهر خلف معاك كواين ,,دايراتلك فاهق قوي وجعانه,,
يمكن أساع نلقالك طبيب يعاين,يوصفلك دوا مضمون في نجحانه,,
يرد البئر:
أمراض عديدة وجعهن استاصل ما طبيب يحيده,,
فاقد جماعة ينظروا لبعيدة ,,ركابة اللي قيس الخماس أسنانه,,
اللي وين ما يقفز الدير يحيده,,و يسابق عناق الريم في قفزانه,,
وان صار المعيط هل عزوم شديدة,,فكاكين للي مالعدو شرقانه,,
وعايشين ع الفطرة أصحاب عقيدة,,فراقهم امخلي حالتي تعبانه,
يامعطن ماجاتك و لا عطشانه أيام قبل من حوضك,,,,مشت ريانه؟؟

تغمد الله روح الفقيد برحمته الواسعة وأسكنه فسيح جناته وألهم أهله الصبر والسلوان
وإنا لله وإنا إليه راجعون

امغير نصهدوا

امغير نصهدوا قاطع عزيز الوانا ،،، لابعيب سمرنا ولا رضانا

مغير نصهدوا ونظنوا ،،، ونقولوا عزيز ايدير ما نتمنوا

اوقات نزعلوا ونقوفلوا ونعنوا ،،، انردوا عليه وندفنوا جوانا

زعلنا انحطوا من جديد انبنوا ،،،ابيوتنا احذاه ونصبحو جيرانا

وهو عنده سوا نمشوا سوا نستنوا ،،، ما عمرةه اطري مشغول من يالانا

امغير نصهدوا ضيعنا ،،، لايوم رضانا ولاوجعنا

ياريتنا نص الطريق قدعنا ،،، عارفين ما يطيبن اثمار عصانا

نهونا عصينا ناسنا ماطعنا ،،،طامعين يبقى ظلنا وذرانا

لاحذاه صيفنا ولاربعنا ،،، ولاعزيز فرشنا ولاغطانا

وضاحك علينا وقتنا ودعنا ،،، شباب عمر عدن يلغبن رحلانا

امغير نصهدوا قاطع عزيز الوانا ،،، لابعيب سمرنا ولا رضانا

مغير نصهدوا حيرنا ،،، لايوم وجعنا ولاقدرنا 

حذا عزيز وايام الشباب اخسرنا ،،،  وهو كل عام امبدلا بذرانا

 وبينه وبين ياسه وبين جذرنا ،،،  قضينا عمار انقدعوا خلانا

 واطري في العرب ينشد انكان حجرنا ،،،علينا عليش امقصرين اخطانا

ويكرب اقناعه وين ما ينظرنا ،،،ووين ما الطريق اتجيبنا ايخطانا

هــو دعوته مابا يجي معا محدرنا ،،، ولابن ايجيبنه اطرق مرقانا

امغير نصهدوا قاطع عزيز الوانا ،،، لابعيب سمرنا ولا رضانا

مغير نصهدوا تعبنا،،، لايوم بعدتا ولاقربنا

خلانا علي منقض رجا شيبنا ،،،علي جمر طافي ماتطيب اشوانا

ضيع عمارنا غير اعيار ذهبنا ،،، رهنا اسنين ومضنا وارخانا

وفينا امشمت لطرفي وعربنا ،،، وضحك علينا ناس ماتسوانا

------عمارنا هلبنا،،، وخسرنا اللي قدامنا وورانا

ياريته ان كان جايه غلط يطلبنا ،،، اهناك ناس في ها الوقت مي غلطانا

ولاهي غرامه كان هو عاتبنا ،،، ياحقوق ياخذ ياحقوق عطانا

ونسربوه م الاول وهو يسربنا وكل شي له قدره وله ميزانه

ويروب الحليب ونمخضوا رايبنا ،،،لنا اسنين نجاروا علي مخضانا

ونغربلوا الخبيث من طيبنا ،،،بعد غربلا يصفن اساع انيانا

فيه من اليمين وم اليسار قلبنا ،،، برمنا عليه معا جميع اركانا

امنين ما نجوه ايفز ويسيبنا ،،، امنيش وعليش عزيز ما ورانا

الادعوته ان كان ماهلب يعقبنا ،،، متخاطيين راياتا وروس اريانا .

قصيدة الشاعر المرحوم على الرقيعى

قصيدة الشاعر المرحوم على الرقيعى ومعه ابن اخيه خليفة محمد الرقيعي
وهو يسأله عن الجهاد بمنطقة الرقيعات والنواحي الأربعة


الابن/ ياسيد ماريت وين خوي عاركو اجدادا ركابة الخيل والبيت عامر شحايح بزادة
ياسيد خبر بيهم علي خيلهم وبيوتهم ورحيهم
اللي يفرحو بالضيف وين ايجيهم وبيت الكرم من الخير خير انضاضة
يسيل الدما لصار مد ايديهم وان جاورتهم ما يسمعوه امكادا
وان رافقتهم زاد الهلالى بيهم تقول من ضنا شيحة اسماح العادا
جيت سائلك سائل علي ماضيهم وحال غايتي في وطنا وجهادا
العم / لك نوصفهم اولاد العرب ياصاحبى تعرفهم
في يوم بو عرقوب زاد علفهم فراسين جارح ضربتا معصادا
خلا العدا فوق الرمال انزفهن غير المطوح كايد العدادا
الابن / ياسيد بيهم خبر وهلل على الاجواد لا تتكبر
سماح الفزع وين النهار يغبر فكاكة الميغور من حسادا
ركابة اللى بوسواد امجبر عيني عليهم دمعها بدادا
العم / ليش ادرف وليش منزوي غادي بعيد امطرف
اولاد العرب يا بو الرقيعي تشرف ان زاد طبلها ينقح سبيب العادا
ركابة اللي بالدهب يتصرف لباسة اللي يبرمو جدادا
واليمعاه العرف ما يتعرف يوم دكرهم يا ريت من المجادا
ثقيل روزهن كان النهار تحرف خيل النواحي الأربعة يا سادا
ويا مرحبة باليى عليهم شرف معمر اللي من البيض لون اجواد
الابن / يا سيد عنهم ياني بعيد الجبا سالم صروع احصاني
اليعادكو يوم جحيم الهاني وبات العدو وباب السرايا كادا
قوي سبيبهم في ساعة الدعكاني ويا طرابلس بيك التريس تنادا
جهاد يا رسول الله عالعدواني جراد طاليا غيره بدوها بادا
قابد علي قايد ولد طلياني في شوارعك تبات الدراع وسادا
وما من اليمكتوب في ديواني فدا ليبيا مجت النار افادا
عزا في عزا واحل مع حبانى لا طير ينقح لا شلت ودادا
هي فانية واللي عليها فاني وكم زين باع الراس دون بلادا
الا ليبيا من حدها الغربانى الا شرقها الارض الجريد حدادا
عشرين عام وعام فيه تعانى ولا نقرضو ليبي بخل بزنادا
العم / لو ريت يوم السايح وحق من كتب علي مثيلي نايح
يا بو رقيعي لو تعد الطايح تعد عدد عمري بالنهار يتقادا
يوم المكوغط والدما يسايح يوم يشيب من نهار اولادا
يوم المكوغط والدبار البايح يوم جهنم يا لطيف اعبادا
يوم اللى لو كان فيه جنايح ظنا طاليا زاور على المعوادا
يوم العرب نالت ثلاث ربايح سلاح ودخير وروحوا بامدادا
وفيه النواحى راكبات جوايح عليه زغرطت صابح سواد همادا
لو ريت يوم الفلة يوم السوانى والخليف على الله
يوم يكيد اللى قوى باعضاضا
بين النواحى وطاليا المحتلة سوقا رسم والبيع روس اجوادا
يوم اغبارا للسحاب اوصلا يوم على نضر العيون مكادا
ويوم الصبايا ناقلات الغلا بلا روسهن ياليبيا عنادا
وياما فقدنا من تريس غزلا اللى لا تحدث يعجبك ميعادا
لا سضيفا لا خادعة لا ذلة لا هم ثقال الدم مالفنادا
ولو كاتب التاريخ عنهم كلا فوق المجلد فاعلين سوادا
ولا بنتهم تلبس قناع الذلة ركابة اللى يخضبو بقلادا
واللى قعد كاى من ينوش بعلا ميخود الوطن ما يطيب نوم رقادا
واللى جلا خش السرير تعلا نزل وين ماحط الغراب اولادا
خدت المحلة فى قرون محلة من فج باطس * لا تراب اعرادا
على ما حكالى بوى واعر حلا حصار السوانى قفل من الحدادا
تهل ثورة الفاتح افعالك كلا مكتوب خطها كوفى قروه انجادا
ويحلف معمر باليمين وبالله عندك 12 يوم يا شرفادا
لا دلوكم من الوطن ينشل بلا ولا ما ملكتو ترفعو برادا
وكيف ما دخلتو تاخدو قرط الله وبعد العسل تاكل الحنظل صادا
كووك بالحديد وخرتوك بخلا كتافك الجبر والكتوف برادا
خلص دين ميت يا خبات الملا ويا زارعين الشر هكى احصادا
احنى وطنا عايش الحمد لله عايشين فيها نعمتا وارغادا
علينا فتح فاتح المولى دلا خدى حقنا والحق موش مكادا
ويا بجاه من اليمجميع تولى جعل كل عيد يكون من اعيادا
ونختم كلامى على النبى من صلا وذكر النبى للنفس فيه افادا

عندي قلب /صالح بوعياد

عندي قلب منك فيه طبت جمره ،،، اصحي من عشمنا فيك واشقي بأمره
 

نـــــــارك طــــــــبت،،، ولاقبل نارك نار فيه انكبت
 

ومامن جميلةبالجمال تنبت،،، اللي نخيلهامسع كلو من تمره
 

وموش كل من هبت عليه ودبت تاخذ النظر ولاهي ادوارة نمره
 

ولاكن صغا قلبي وعيني شبت ،،،وفيه شي واعر موش ساهل طمره
 

وعندي عين جبيتي وراك وجبت ،،،وعندي قلب مختارك عشيرة عمره

نــــارك كامــــض ،،،ورت ورد واجـــد فيه يانا رامـــــض
 

وراي لاعرفته مر لاهو حامض ،،،وجينا اصداف ايام فيهن ضمره
 

وانتي موقفك موفق ابنادم غامض ،،،لاخش الظلام ولاطلع للقمره .

الغوط لروفه للشاعر المرحوم روفه دعبوب

الشاعر :
ياغوط جرتن عليك نزالي ** ويانك اتصهد اليوم منهن خالي
جرت عليك مطارح ** وجرت اركيب فيك واجد سارح
أسياده الواحد كي الطير الجارح ** على هيبته والوطن صيته مالي
صنديد فوق من وافى نصية قارح ** وين ما قفز يلحق الريم الفالي
اجواد ضيفتم بايت ابقدره فارح ** ع الجود والكرم شاكر الله العالي
مو كيف حالي بتت فيك البارح ** في جنب سدرة ما حذايا والى
الغوط :
كانن على سدادي ** نواجع ابوادي من صلاب سعادى
جلايت اهمومه وين نق الصادى ** أحماه الطليب اللي لفاهم جالى
غيثى وشيهنى وعوكلى ورفادى ** اجواد هجرهم واجد امردى حالي
على لا تخطرهم اتجى بدادي ** الدمعة وما تمسح غباين بالى
على كل طاره تاركين نضادى ** اديار يصهدن آهن اليوم خوالي
طالب المولى والرسول الهادي ** عليا يعودوا والزمان يوالى
الشاعر :
ياغوط شين خلو أديارك **وقاعد أتصهد أتخوف اللي زارك
ع الجوع والعطش باتوا جفايا خطارك ** لا فيك ظل ولاذرا لليالى
أتقول فوق منك دايرات معارك ** عجاجك أيثوب والرياح عوالي
بالله قولى طالب اليوم عمارك ** و مافيك حاجه للحياه اتوالى
الغوط :
وسع بالك ** وصفى كلامك قبل عل أسوا لك
وهناك شي واجد يجهلوه أمثالك ** أو بشرح تبيله أمدد و اجالى
لا بوك لا عمك على حكالك ** اللي يعرفوني أو حالهم من حالي
على يشهدوا بالحق رآهم بالك ** ونا عذوتي فوق م لحروف تنالى
انكأن فلحوا مضمون صابة مالك ** و نكان رودو يلقوا ربيع أيوالى
ما هم اللي كيفك إرقاق مسالك ** نكارت جمايل واليدين خوالي
أنت هولي موحش وشين خيالك ** لا كاط فوقك لا لبست اجبالي
انكانك مشيت أتقول مشيت هالك ** أصلاب حيط ما يريدن الكعب العالي
حتى فالجلوس أم ضايقك سروالك ** ولله يا ولد مدعاك شاغل بالي
الشاعر :
ياغوط شين كلامك ** ويصعب على ما نريد ألطامك
وان كان لك ملام على عد ملامك ** ولا توجعك منى انلط اسوالى
احكيلى عللى نازلين أوهامك ** ويش فرقهم عنه الجيل الحالي
الغوط :
بينكم سناحه ** ومشيت اطناشر يوم ع الرداحه
لا تمولوا ولأنكم تريس افلاحه ** ولا فالشدايد ضربكم قتالي
اسملى عليكم رايمين الراحة ** وهى دلو لو مليت ارشها بالى
اتشيل قوتكم مركب اتجى طفاحه ** وان الرخا واسع عريض الجالى
وان البحر يصعب علل الملاحة ** هناك وين تذكر صحيح أقوالي
لا زرع قدامك ولا صياحه ** مخلى وقدامك الهود الخالي
وتلقى ارياقك مر فيه كلاحه ** ونادم عليها تركتى وإهمالي
والجيل لولى جاهد أيريد إصلاحه ** وفى عيونهم ديمه عزيز وغالى
قاريين ما نزل لله فألواحه ** وماسكين في يد الكريم العالي
الغيث يطلبوا للبير وان نزاحه ** ومن غير ربهم مالهم طمع في والى
كسابت اكحيله فالشقاء والراحه ** اشداد العزايم في كدر لاجالى
ركابت قصير القيد بوطراحه ** قناد الطوارف وين جاك ايشالى
أصحاب الفريق اللي سعيد صباحه ** متقادى ونزوله فالنظر يزهالى
صلاة النبي ع لمال فيه سماحه ** سواء لا نشر ولا امراحه مالي
واكحيله ان مدت عندها نطراحه ** أتزهى الخواطر والعقول أتوالى
والليل وين ما حاشت يجى زناحه ** دنين حشوها تحلف نحل جاء جالى
أو سيدها وراها بدقرتا ووشاحه ** صعيب دنوها ما هي قليلة والى
أيعفن الا تعفين فى مطياحه ** غزايها لا دفن لا غسالى
هاذاك جيل عدا وجد في مطراحه ** جيل منعكس ما خشي ساعه بالى
امغير كيلي يلعب ع الدرجاحه ** واللي تقدمه يرجع بها للتالي
الشاعر :
ياغوط ديك باهى ** وريتني موال عنه سأهي
ومانى امعاك سريب تو ناهي ** مستاحش ونسنى و فضي بالى
كم جيل عاشرته زمانه زاهي ** وكم جيل ريته في نكد متبالى
وكم قرن مر عليهم شين وباهى ** وكم قرن عديته اتصهد خالي
آنت يزمطن فالناس فيك دواهي ** ولا بالخلا رايد عليك العالي
الغوط :
الخلو موش معاره ** ونا كشف سرى ما عليك اخسارة
ربك خلق كونه ودار مصاره ** وأتدور لرض ويمرن بها لجالى
ونا حكايتي تصعب علل فساره ** طويل سردها يأخذ امدد واجالى
من يادم وحواء تأخذ الخباره ** ترتيب لعند الزمان الحالي
أول جيل جا داير اسلاح احجاره ** أوماله مقر ايذوح ديمه جالى
وجونى بعدهم اللي قسي جباره ** ابيوتم سطوهن نحت في لجبالى
غير دور تلقى فالوطاه إثاره ** تستاعظ و تلقاهن صحيح أقوالي
وجانى بعدهم جيل باستقراره ** واطن بنى فوقى أقصور عوالى
وفوقى فنا كله وخليت داره ** وفات مابنى للبوم فيه ايشالى
وجانى بعدهم جيل فيه حضاره ** وقسم وطاتى بالجسور عزالى
الخير عمنى تميت في نخضاره ** وجنة جميلة فالعيون اتوالى
عليا كتب ربك ابشد امطاره ** وسلط عليا هبوب ريح قبالى
قلواه نين ماخلى حطب بثماره ** وأخليت م البشر تميت نصهد خالى
ولعند توا قاعدات ابياره ** على مافعل تشهد بدون اسوالى
وقوما لفتلى جاهله ونصاره ** وقوم من قبائل بربرى وندالى
دوم في بعضهم شانين الغاره ** اسلاحهم الحربة والسيوف مجالى
رسيم حربهم مايوم تطفى ناره ** ولا يحرمو ولا يحلو جهالى
وياما لفولى من اجواد عصاره ** ومن نجد مروبى ضنا لهلالى
تونس امرودها عفاهى داره ** ويونس اسير القصر بين دوالى
عليك قال حازنى ابواب بالسكاره ** امفيت فزعتك مالى نجا ياخالى
وراس جدكم سوس على مزياره ** فارس امعدى فوق روس مشالى
وأبنى صور درنه وحط تحت جذراه ** وتواطا نباه وكان صيته عالى
والقري عليه امهونات اتباره ** شيال الثناء في فقد صاحب غالى
رد الكفا بالمال واجب داره ** شهير خلده فعله اسنين اطوالى
وجدك حبيب امنين خذ مشواره ** وغرب على فلوه ايريد الوالي
ايمين حالفه ملزوم ياخذ ثاره ** من ناس مالهم موطن اوجوه جوالى
وطرد اللى كانو عرب حجاره ** نين حازهم راس الحجاج العالى
لوكان تسمع جيتا وشعاره ** مامن عجب فيها حديث ايوالى
وين مايجيب نباه في قذاره ** اتوه غير في وصفه الوطن الغالى
والغيثى عليكم ليش خذ الكباره ** الا أبجيبته الراسه ردى لفعالى
جايب ايدين امكلالات بماره ** فوق من جواده ماليات مخالى
بعدها الوطن ارتاح موج بحاره ** وتمو هله في راحه وصفوة بالى
قوافل ايجنه جايبات اتجاره ** وفى خير ماراعى نهار نكالى
وكانت منازل هلل في هاطاره ** كسابين للغره ولم ابها لى
وخليت وين ماشد الزمان اوتاره ** وين النواجع ساقهن ليطالى
وجانى لكم شايب من شعاره ** وهاجا على خلوى الراس العالى
وذاكر العلبه اللى شهيره اصداره ** غوط بوهفيره فالمراض ايوالى
يوم غبهم يصبح عليه احشاره ** وان المسى يلفن افراق متالى
وفرج عليه الله رد انواره ** وعاود طويل العمر م لاهالى
وراقو بعد عقدت الريق مراره ** في وسط حفره رملها هيالى
ايحدثوك مازالو شهود كباره ** على سنين عاشوهن معا لنذالى
عايرتنى بالخلو موش معاره ** مكاتيب مافيهن سبب من والى
وامسك كتاب الله شوف اسطاره ** القران حكمه ومنبع الامثالى
شوف قصته عوزير هو وحماره ** وين مانكر قدرة الله العالى
وعدا على قرية وهى منهاره ** وقال هذى ماتعمر خريبت جالى
وهو مات ميت عام قرن اعباره ** وين ناض يحاسبه الفجر التالي
استغفر بعد نور الله افكاره ** وراعى احماره وهو رميمه بالى
ربك عظيم وقدرته جباره ** رجع حى يرزق كيف قبل وتالى
وراه الوقت في يد الكريم مساره ** وبذكر النبى نختم عليك اسوالى
الشاعر :
ياغوط ياما جارى فيك ** غير ثاريتك على اموارى
نشدتك على خلوك وجبت سهارى ** عجيبه الدنيا كل يوم ابحالى
اتبين الخافى وشهير اتوارى ** تبنى العش وتهدم القصر العالى
ولا يعجبك فيها اشبوب بدارى ** أتثنى عليه ابومد ريح قبالى
تضحك وتبكى وخافية لسرارى ** غدارة وماضمن نجاها والى
مرات بالفوايد اتبايعك وتشارى ** ومرات بالخسائر سوقها دلالى
ياغوط منها حايرات افكارى ** الدنيا مافيها اطامن بالى
ناحرت ونريدك انت دبارى ** وانت امعاشرها امدد واجالى
ناكيف فيها ينعدل مشوراى ** وهى ادروبها متعوجات اقبالى
الغوط :
ينعدل باموره ** وصلى صلاتك قبل يوم انشوره
وذكر الله في رقدتك وثوره ** وقول يالله ديمه عليك اتكالى
وأحسب القبر اللى امعدى شوره ** وقول يالله تصلح جميع أعمالى
ولا تغربك الدنيا اللى مغروه ** تعزك اليوم وتقهرك فالتالى
جميع ماخلق ربك فنى سيوره ** مافى شى ايدوم غير العالى
ابجاه الكتاب اللى نزال باسوره ** ايصلح الموالى حالتك واحوالى

تعزية

السلام عليكم /
بقلوب مؤمنه بقضاء الله وقدره اتقدم بأحر التعازي وصادق المواساه للاخ الاستاذ
جمعة عبدالعليم
في وفاة المغفور له بأذن الله
الحاج محمد عبدالعليم
وانا لله وانا اليه راجعون.